सुतकं

उगा नको रे मागू
माह्या मराची साधनं
चांद गोंदलेलं मनं
सांज कोरलेली क्षणं

उगा नको रे मागू
तुझे माझे रात धनं
माह्या मिठीतले ऋणं
तुह्या मिठीतले ऊनं 

उगा नको रे मागू
ओठी दडलेली गोटं
तुझं जग झालं पोटं
माह्या पोटी खरगटं

उगा नको रे मागू
तुह्या कुळाले दीपकं
वाटे तुले जे कौतुकं 
माह्या गर्भा ते सुतकं 

-भूराम (६/१४/२०१८)

झाला दुःखाचा पाऊस

झाला दुःखाचा पाऊस आणि पावसाची गाणी
टपटप थेंबातुनी,
झरलेल्या आठवणी , ...

सरल्या ना आठवणी.

रान आभाळ धरते, प्राण गाभुळ करते
श्वास रेटे श्वासातून,
सर वाटे बतावणी,...

सरावल्या  आठवणी.

किती गुंतलेले मन, नसे गुंता ज्या मनात
रिपरिप सरे ना ती,
डोळा जड झाले पाणी,...

आसावल्या आठवणी.

कुणी बांधले ना सुख, दावणीला आडोश्यास 
गायरान बहरेल, 
लोभ दाविला ना कुणी,...

गढुळल्या आठवणी.

ओल झाले रे शिवार, त्यास डबक्यांचा भार,
त्यात पावले दुडता,
गोड झाल्या पाठवणी,...

उघडल्या आठवणी.

-भूराम ६/६/२०१८(पुणे)